Tölegli esasda bilim alan talyplara diplom gowşurmak dabarasy geçirildi.
Türkmenistanyň orta we ýokary okuw mekdeplerinde tölegli esasda bilim alan talyplar ilkinji gezek iki ýyllyk önümçilik tejribeligini geçmezden diplom aldylar.
23-nji iýunda Türkmenistanyň Prezidenti Serdar Berdimuhamedow “Hukuk namalary hakynda” Türkmenistanyň Kanunynyň 30-njy maddasyna laýyklykda, degişli karara gol çekdi. Resminama laýyklykda, “Orta hünär we ýokary hünär bilimli edaralarynyň uçurymlaryny işe ýollamagyň Düzgünnamasyny tassyklamak hakynda” Türkmenistanyň Prezidentiniň 2019-njy ýylyň 3-nji fewralynda çykaran 1113-nji Karary bilen tassyklanan orta hünär we ýokary hünär bilimli edaralarynyň uçurymlaryny işe ýollamagyň Düzgünnamasyna üýtgetmeler we goşmaçalar girizildi.
Ýakynda Aşgabat şäherindäki agrosenagat orta hünär okuw mekdebimizde tölegli esasda bilim alan talyplara diplom gowşurmak dabarasy geçirildi.
Mekdebimiziň direktory, mugallymlar we uçurym talyplar Hormatly Prezidentimiz Serdar Berdimuhamedowyň janlarynyň sag, ömürleriniň uzak, tutýan il-ýurt bähbitli işleriniň elmydama rowaç almagyny tüýs ýürekden arzuw edip, öz hoşallyklaryny bildirdiler.
