Sport – sagdyn durmuşyň gözbaşy
Berkarar döwletiň täze eýýamynyň Galkynyşy döwründe “Pähim paýhas ummany – Magtymguly Pyragy” ýylynda ata Watanymyz Türkmenistan Milli Liderimiziň, Arkadagly Gahryman Serdarymyzyň saýasynda ähli pudaklar boýunça ösüşlerden ösüşe, ýeňişlerden ýeňişe, şanly gadamlarda bedew bady bilen ynamly öňe barýar. Ähli pudaklar bilen bir hatarda, türkmen halkymyzyň saglygyny goramaga, ýurdumyzda sagdyn durmuş ýörelgelerini giňden ornaşdyrmaga, bedenterbiýäni we sporty ösdürmäge gönükdirilen tagallalar Hormatly Prezidentimiziň alyp barýan döwlet syýasatynyň ileri tutulýan ugurlarynyň biri hökmünde barha rowaçlanýar. Häzirki wagtda diňe Paýtagtymyz Aşgabatda däl ýurdumyzyň çar ýanynda gurlup ulanylmaga berilýän stadionlar, sport we bedenterbiýe-sagaldyş toplumlary, sport meýdançalary, okuw mekdepleriniň sport zallary sporta höwesli ýaşlardan dolup dur. Şeýle ajaýyp, sagdyn durmuşdan röwüş alýan türkmen halkymyzyň her bir güni toýdur baýramlara, şanly senelere beslenýär.
Ine şeýle şanly wakalara wysal bolup, 7-nji aprel Bütündünýä saglyk güni mynasybetli Bagtyýarlyk etrap häkimligi, Türkmenistanyň Demokratik Partiýasynyň Bagtyýarlyk etrap komiteti, S.A.Nyýazow adyndaky Türkmen oba hojalyk uniwersiteti şeýle-de Aşgabat şäherindäki agrosenagat orta hünär okuw mekdebi, Türkmenistanyň Magtymguly adyndaky Ýaşlar guramasynyň Aşgabat şäheriniň Bagtyýarlyk etrap geňeşi hem-de Köpugurly “Bagtyýarlyk” sport toplumy bilen bilelikde gurnamagynda, talyp-ýaşlaryň gatnaşmagynda sportuň dürli görnüşleri boýunça aýdym-sazly sport çäresi geçirildi. Asuda asmanyň astynda, Köpetdagyň etegini etekläp oturan Ak şäherimiz Aşgabadyň sergin şemaly bilen maşklaryň ýerine ýetirilmegi talyp ýaşlarda özboluşly täsir galdyrdy. Köpugurly “Bagtyýarlyk” sport toplumynda gurnalan çäräniň esasy maksady hem sagdyn bedenli, sagdyn ruhly nesilleri kemala getirmek hem-de halkyň geljegi bolan ýaş nesliň saglygyny goramak, milli sporty halkara derejesine çykarmakdyr.
Milli Liderimiziň, Hormatly Prezidentimiziň döredip berýän mümkünçiliklerden ugur alyp, türkmen ýaşlarymyz sportuň dürli görnüşleri boýunça, dünýä döwletleriniň arasynda geçirilýän giň göwrümli sport çärelerinde ýaşyl baýdagymyzy has-da belentde parladýar.
Aşgabat şäherindäki agrosenagat orta hünär okuw mekdebiň mugallymy
Sopyýewa Jennet
